كيف تكون مميزا في القسم العام ........ هام لكل الاعضاء, لازم بكرة يبقي احلي

السلامـ عليكمـ ورحمة الله وبركاته

علي احلي اعضاء
انا حبيت الوقتي اني انزل التوبيك دا عشان نعلي بجد بمستوي القسم بتاعنا وبالتاالي بمستوي المنتدي ككل
فيلا نبدا بقي

"اولا الاسلوب "

في ناس كتير اوي في المنتدي ليهم اسلوبهم الخاص في تقديم المواضيع
سواء ان كان عن طريق طريقة معينة في الكتابة او تنسيق معين او حتي بعنوان معين
ودا بيخلينا كتير اننا نعرف مين كاتب التوبيك دا من غير حتي ما نقرا اسمه
لازم نحاول اننا ننفرد باسلوبنا ويبقي لكل واحد فينا لمسته الخاصة الي تخلي التوبيك بتاعه متميز بصاحبه

كمان ودي عن تجربة شخصية
معظمنا بيتخنق من التوبيكس الي بتبقي طويلة اوي ومكتوبة باسلوب معقد جدا وبلغة عربية فصحي " فصحي اوي يعني"
ودا الي بيخلي دايما عدد المشاهدات اعلي من عدد المشاركات
ان معظمنا بيدخل يتخنق ويطلع مع ان التوبيك بيبقي بيتناول موضوع مهم جدا
فا كل ما بنبقي كاتبين التوبيك بطريقة سهلة ولذيذة كل ما بنلفت الانتباه اكتر ليه و يخلي الي بيدخل لازم يحط لمسته فيه
المشكلة المسببة للموضوع دا ان معم التوبيكات بتبقي منقولة من منتديات تانية وطبعا معظمها للعرب ومكتوبة بلهجتهم
فا حتي لو ناقل التوبيك فاكيد ناقله عشان عجبك يعني قريته
فممكن تكتبه تاني بلغتك انت
واسلوبك انت وكمان تضيف عليه وجهة نظرك وبالتالي تجبر كل الي يدخل انه بحب الموضوع ويرد عليه ويشارك برايه
وينقله كمان لمنتدي تاني

"ثانيا المشاركات"

مفروض ان القسم العام قسم نقاشات في امور الحياة المختلفة
متخليش دخولك عليه مجرد دخول انك تقول رايك وتمشي وتناقش صاحب التوبيك لو رد علي مشاركتك
لا كمان تشارك غيرك في رايهم اكيد مش حيبقي كلنا نفس الاراء
عايزين التوبيكات توصل لخمس وست صفحات من النقاشات

ثانيا بما انه توبيك نقاش
فلازم نبقي واعين جدا للحكمة الي بتقول "اختلاف الراي لا يفسد للود قضية"
يعني مش عايزين نخسر بعض يا رجالة ويبقي ردنا في حدود الدبلوماسية
يعني نتعصب بس بالذوق نتنيفز بس بالياحة

"ثالثا الموضوعات"

عايزين يا جماعة نخرج بقي من موود النقل شوية
لان الواحد بيشوف توبيكات اتكتبت قبل كدة اربع خمس مرات
وشافها في مية منتدي بل كدة
يعني فيها لو كل واحد نزل توبيك بفكره ه ولو واحد من اصل عشرة
حيبقي ليه طعم تاني
لان اكيد التوبيك دا حيبقي ناتج عن حاجة حصلتله او موقف اتعرضله يعني موضوع قابل للنقاش العام

انا عارف اني عمال اقول واتكلم عن النقاشات مع ان اكيد القسم بيضم مواضيع تانية في كافة نواحي الحياة
بس المواضيع التانية دي بتبقي للمعرفة والسلام
لكن الاهم دايما بيبقي ابراز الراي والتفكير

حاجة اخيرة في حاجة لازم بجد نعرفها ونتاكد منها
ان توبيك واحد عليه عشر ردود
احس مية الف مرة من عشر توبيكات معليهومش غير رد واحد

انا عارف اني اكيد دوشتكم
بس بجد لو كل واحد فينا عمل بالي فات
بجد حنقدر نوصل للي احنا عايزينه
ومش مهم كل واحد فينا عنده كام مشاركة
المهم هو متميز اد ايه بالمشاركات الي عملها
واهم حاجة بجد
ان توبيك واحد عليه عشر مشاركات احسن مية الف مرة من عشر توبيكات لعيهم مشاركة واحدة

تحياتى
الادارة